Удмурт ретромон

1999-тћ ар, тулыс. Улонэз адњиз Анатолий Эркишевлэн нырысетћ кырњан альбомез. Кассетаосын вуз карисьёс выль но шулдыр удмурт кырњанъёсты базаръёсын бергатћзы. Мыным, 18 аресъем студентлы, сокем паймымон вал со! Калык базарын кияр, яблок, вермишель басьтэ, нош пель сьќразы чузъяське удмурт кырњан. Малпасько, удмурт адямиос соку Эркишевлэн кассетаезтэк базарысь ќз кошкылэ. Макем шумпотымон вал со: «Яратон, ой, яратон», «Тодыса-а, тодытэк-а», выльмем «Ой, тћ чебер нылъёс» но мукетъёсыз. Ортчиз ни дас арлэсь кема. Нош асьмеос али но со гуръёсты кылзћськом, соосъя эктћськом.

Шонерзэ вераса, ваньмыз та љоген ретро луыны кулэ, нош со – асьмелэн туннэ нуналмы. Мукет выльзэ но яркытсэгес џектћсь ќвќл. Малы? Интернет «бусыын» џашетон
Февраль толэзе син шорам йќтћз «В контаке» сайтысь «Юмшан промо» группаысь огез гожтэт. Ижысь Алёна Китова вера филармоние Яратћсьёслэн нуналзылы сћзем концертэ ветлэмез сярысь. Нылмуртлэсь гожтэтсэ вакчиятыса сётћськом.
«Филармоние мынћ абонементъя. 4 концерт учкон понна 600 манет тыри. Но нырысь ик син шоры йќтћз: љыныез кырњанъёс кылем концертысь «лыктћллям». Оло, мон мазэ ке уг валаськы? Уго тодэм-валамея, абонемент – со пќртэм концертъёслэсь сузьет луыны кулэ. Таяз учырын билетъёс вузамын, нош концерт азьвылэз ик кылем, солэн дырыз гинэ кќня ке толэзьлы воштћськем. Неужто артистъёс кык толэзь куспын выль номеръёс дасяса вуиллямтэ? Иське, малы кырњасьёсмы таџе пќяськонэн выро? Та удысэз бырйид ке, мыло-кыдо ужа. Кылсярысь, дышетћсь кык толэзь џоже пиналэз огвыллем урокен визьмояз ке?»
Озьы ке но Алёна ушъя Анатолий Эркишевез но Сергей Галкинэз – соос, пе, концертэ ќжыт ке но выль тулкым пыртћзы. Котьку сямен учкисьлы быдэсак усьтћсько Анна Плотникова но Владимир Мальцев. Озьы ик кельшем љытэз нуись – телевидениын ужась Петя Пушкин.
Интернет бамын ик та мылкыдлы пумит аслэсьтыз малпанзэ кисьтћз эстрадаысь кырњась Марина Галичанина.
«Концертын 23 номер вал: пќлысьтыз 8-эз вуж, 12-ез выль. Яке кызьы ужано артистъёслы? Кырњанэз одћг пол быдэстоно но со сярысь вунэтоно-а? Оло, учкисьлы ќз кельше дћсьёсмы – тазэ котькуд концертлы выльдыны уг кылды, уго коньдон асьмеос печатланы ќм на дыше. Сое шедьтоно луэ, концертъёс возьматыса. Кылсярысь, январь џоже 15 пол сцена вылэ потамы. Со куспын февральлы 12 выль номер дасямын. Кык пол ке но ветлэ ай Удмурт театрысь концертъёсы, соку выль кырњанъёс но номеръёс сярысь вераськонмес азьланьтыны луоз».

Кугњам кырњан
Озьыен, кыџе пагњае кугњамын асьмелэн удмурт кырњанъёсмы? Крезьгур – эстрада гинэ ќвќл. Верам туж потэ удмурт классика сярысь, но туннэ нокытысь сое кылыны, нокинлы выль гур гожтыны. Соин ваньмыгес сямен выжиськомы эстрада вылэ, но татын но чырты кузь луэ, воштћськонъёсты возьмаса.
Удмурт эстрада кырњанлэн тужгес узыр но љутћськон вакытэз тупаз 1990-тћ аръёсы. Ма, вань удысъёс со дыре выльдћськизы, лэся. Соку «Октябрь» культурая юртын нимысьтыз љытъёс ортчылћзы. Арнялы быдэ сямен выль кырњан лобылћз учкисьёс доры. Соку ик Удмурт радиоын вань та выль кырњанъёсты мыло-кыдо гожъязы. Бќрысьгес кылдћз «Ингур» радио. Вань выль кырњанъёс FM тулкымъёс вылын калыке вќлмылћзы.
Николай Карпов со вакытэ ужаз Удмурт радиоын крезьгуръя редактор луыса. Аппаратура сокем усто ќй вал, куштћськон калэ вуэмын. Бен, вылез ноку ќз но вуы ни. Со понна вал њеч инты: шыпыт студия, пульт, кырњась азьын микрофон – куара њеч гожтћськылћз. Пќрмылћз выль кырњан. Туннэ буш сылэ радио юрт – кемалась нокыџе куара ќз ни чузъяськы татысь студиын. Николай Карпов кырњан удыслэсь туннэ но люкиськемын ќвќл. ВГТРК-ын куарая режиссёр луыса ужа. Туж курисьёс луо ке, куддыръя нылпи кырњанъёсты гожъя. Студиын ќвќл, огшоры квартираын. Но куараез чылкыт гожтэм сяна, туннэ кулэ кырњанэз мукет чеберматон амалъёс.
Удмуртилэн Россиен валчеяськемзылы 450 ар тырмонлы шаерамы усьтћськиз Эшъяськон юрт. Азьвыл со «Октябрь» культурая юрт вал. Оскон сётћсьёс луизы: татын луоз удмурт кырњанъёсты гожъянъя студия. Эшъяськон юрт усьтћськиз 2008-тћ арын сентябре. Кин ке та студие вуылћз-а ни? Выжыятыны выри тодмо кырњасьёсмылэсь, но нокин уг тоды.
Юртлэн директорезлэн воштћсез Татьяна Шкляева вера: студия ќвќл. Та студиез кылдытон нырысь-валысь проектэ пыртэмын вал. Бќрысь тодмо луиз: лэсьтћськонлэсь бюджетсэ 2 миллион манетлы кулэстћзы. Озьы аппаратуралы уксё ќз ни кыльы, соин валче ќз кылды студия. Озьы ке но Эшъяськон юртын крезьгурез њеч тодћсь адямиос вань. Соос юрттэмъя татын кырњанзэс гожтыны быгато бадњым коллективъёс – кылсярысь, алигес юрттћзы «Чипчирган» ансамбльлы. Нош егит артистъёсты татын нокин уг возьма.
Љужась кизилилэн њеч кырњанэз кылдћз ке но, сое гожтонлы аслыз бызьылоно луоз. Нош њеч студиос ќвќлэн, удмурт кырњасьёсты валтћсь рос-прос продюсер кылдымтэен, та удысын вожвылъяськон ќвќл. Соин егит кырњасьлэсь уксёзэ кин кызьы быгатэм куасалто.

Поръёс поръяло
Воксё мукет югдур Марий Элын. Малы поръёсын џошатћсько? Уго фин-угор дуннеын пор эстрада бадњым вамышъёсын азьпала бызе. Интернетын пор кырњасьёслэн нимысьтыз сайтсы вань. Татын тодматскыны луэ артистлэн улон сюресэныз, кельшись кырњанзэ аслыд кельтыны луэ. Ватсаме потэ: таџе кырњан песьтэръёс одћг гинэ ќвќл – быдэс сузьет.
2005-тћ арын пор музъем вылын кылдћз «МариРекордс» продюсер студия. Та аре ик ужаны ќдъяз «Марий Эл Радио». Татысь крезьгуръя редактор Андрей Чемышев верамъя, радио уй но нунал џоже пор кырњанъёсты бергатэ. Нуналаз одћг час висъяське бигеръёслы.
«Марий Эл Радиоын» арнялы быдэ эфире потэ ог 5 выль кырњан. Вожвылъясько егит кырњасьёс но, арлыдо артистъёс но. Озьы ик студиос куспын но пуромемын џошатскон – соос Йошкар-Олаын ог вить. Соин одћг кырњанэз быдэсак дасян – куараез гожтон, тупатон, аранжировка – 5 сюрс манет пала усе.
Котькуд шутэтскон нуналъёсы чузъяське хит-парад. Кылзћсьёс быръё тужгес устозэ 20 кырњанэз. Со сяна, городын туж трос луо концертъёс. Куддыръя одћг нуналэ кык-куинез џош тупа. Озьы ке но калыкез котькытчы тыраз люкаське. Продюсеръёс та вылын коньдон жильдо, вылысьтыз вылаз потто кырњанъёсын дискъёс. Иське, пор шаерын њеч жильы кылдэмын: студия вань, кырњанэз калык возьма, радио сое бергатэ, артистъёслэн ужаны мылкыдзы бурдъяське.
Мукет ласянь, вань радиоосты но одћг радэ пуктыны уг луы. Поръёслы удалтэм – кырњатћсь но шулдыртћсь каналзы вань. Асьмелэн «Мынам Удмуртие» радиомы мукет удысын ужа – тросгес ивор сётэ. Туж тырше ке но кырњанъёслы саклык висъяны. Кылем субботае 15 часысен 17 часозь радиоез юри кылзћ. Эфирлэн берпуметћ часэз сћземын вал њечкыланъёслы но саламъёслы. Кылзћсьёс куро Надежда Уткинаез, Валентина Пудоваез, Анатолий Эркишевез. Чузъясько дасо ар талэсь азьло гожтэм кырњанъёс. Кык час эфир џоже та нуналэ 16 кырњан вуиз кылзћсьёс доры. Иське, мар на веранэз. Асьмелэн сыџе жильымы тћяськемын.
Та пумысен крезьгуръя режиссёр Николай Карпов пусъе: луыны кулэ кќня ке канал. Кылсярысь, бигеръёслэн вань асьсэ классиказылы сћзем тулкымзы, мукетаз кыла-гурла эстрада, куинетћяз чузъяське шансон. Удмуртъёс – крезьгурчиос таџе жанрез вќтало меда?
Трос-а выль нимъёс удмурт эстрадаын? Огвакытэ «Мынам Удмуртие» телеканал пыр возьматыны кутскизы выль клипъёс. Тодмогес луизы Марина Карпова, Ирина но Настя Чушъяловаос, паймытъяз Дмитрий Загребин. Таослэн но тылгизьызы уг ни тэля. Выльгес удмурт кырњан утчано ке – тодмоос пыр яке кыџе ке сайтысь «лушкано». Диск басьтоно ке, номыр шумпотымонэз уг луы: отысь кырњанъёс пќлысь љыныез азьвыл альбомъёсы пыремын ни, яке дасям дисклэн њечлыкез туж улћын.

Эктыны ке мон потћсько…
Пусйысал на удмурт шулдыръяськонъёсмес. Шумпотымон, берло кык-куинь аръёсы асьмеос тапыртћськомы тузћ клубъёсын. Город шоры «Авиаторе» уллёен лыкто егитъёс. «Фэшн клубе» сюрес усьтћськиз арлыдогес калыклы. Но татын но чузъяське вужмем удмурт эстрада.
Зэм, вань «Сайлент Ву Гур», «Электроники» ди-джейёс, радиоын «Эктоника» уй программа. Но кќт сюман уг буйга.
Огпол мылкыдзэ кылћ Анна Плотниковалэсь. Артисткалэн тужгес вќлмем «Яратћ мон тонэ» кырњанэзлы ремикс гожтћллям. Ачим адњи: егитъёслы со туж кельше, дискотекаын позыръяськыны усто. Нош аслыз авторлы љожмыт: бак мурт сямен вить минут џоже «я-я-я-ратћ» шуыса коскасько, пе.
Собере дыртћськом вормонъёсынымы азьло ик ушъяськыны. Егитъёслэн дискотекаязы, пе, 100-150 мурт лыктэ. Но малпаське ай: ортче со толэзьлы огпол, куддыръя кык пол. «Фэшн клубысь» «Мылысь-кыдысе» котькуд арнянуналэ сю пала адями лыктэ. Умой кадь. Озьы ик «Редуктор» культурая юртын дискотека нергеос радъяськылћзы. «Фэшн клубын» ик вторник уйёсы егитъёслы эктонъёс луылћзы. Но татчы но калыкез кыскыны туж шуг.
Џошатон вылысь: поръёслэн егитъёслы чаклам дискотеказы Йошкар-Олаын арняяз куинь пол луэ. Со сяна, толэзьлы огпол люкасько городысь тужгес дуно эктон площадкае. Татчы, пе, 500-700 мурт лыктэ.
Асьмеос быгатомы меда? Но мукет ласянь, нокытчы мыныны 30 арессэс ортчем егитъёслы. «Авиаторын» кисырано ни, «Мылысь-кыдысь» вазь кутске.

* * *
Одћг газет бам гожтыса гинэ, та югдурез уд вошты. Мон туж курысал асьсэ малпанъёсынызы вазиськыны крезьгурчиосты но кылбурчиосты – вань-а соослэн шыкысъёсазы туала удмурт кырњанъёслы тупась гуръёссы но чуръёссы. Та вераськонлэсь палэнэ медаз кариське вал артистъёс. Уго учкисьёс туж ярато но возьмало сослэсь азинскемзэс.
Удмурт кырњан чузъяське ни Москваын, ќжыт гинэ ќз вуы «Евровидениозь». Нош Удмурт шаерамы асьмеос весь учкиськомы на мышкамы.